कल्पनेध्ये खूप मोठी ताकद असते. कल्पनांमध्ये माणसाच्या रोजच्या जगण्यामधे मोठा बदल घडविण्याची क्षमता असते. कल्पना जगात मोठे बदल करायला कारणीभूत ठरतात. म्हणूनच TED या संस्थेने या जगात मोठे बदला करण्याची क्षमता असलेल्या कल्पना तुमच्या-आमच्यासाठी खुल्या केल्या आहेत त्या या संकेतस्थळावरील चित्रफितीद्वारे.
याची सुरवात १९८४ मधे T- Technology (तंत्रज्ञान) E- Entertainment (करमणूक) आणि D- Design (रचना) या तीन विश्वांना एकत्र आणून त्यावर समग्र विचार व्हावा यासाठी केली गेली होती. या संस्थेच्या सुरुवाती मागे जगातील काही महत्वाची डोकी कारणीभूत आहेत. त्यामधे मायक्रोसॉफ्ट्चा संस्थापक बिल गेट्‍स, गुगलचे लॅरी पेज, विख्यात मनोवैज्ञानिक स्टीव्हन पिंकर सारखी मंडळी आहेत.
विविध क्षेत्रातील कल्पक व्यक्तींनी आपले नाविन्य, अनुभव इतर तज्ञांना सांगितले तर त्याचा उपयोग बर्‍याच क्षेत्रांना होऊ शकतो असे या संस्थेचा अनुभव आहे.
आज या संकल्पनेचा व्याप पुष्कळ वाढला आहे. आज इथे जगातल्या अनेक तज्ञ व्यक्तिंचं त्यांच्या विषयातलं ज्ञान व्हिडीओजच्या स्वरुपात सर्वांना उपलब्ध आहे. तज्ञांबरोबरच ज्यांनी त्यांच्या क्षेत्रात काही अभिनव प्रयोग केले आहेत अशा प्रयोगांबद्दलही इथे बोलले जाते.
इथल्या सर्व व्हिडीओजची इंग्रजी प्रतिलीपीही (ट्रांस्क्रीप्ट) या संकेतस्थळावर उपलब्ध आहे. काही ट्रांस्क्रीप्ट्स्‍चा तर हिंदी आणि मराठी अनुवादही झाला आहे. आपल्या आवडत्या विषयात नाविन्य आणण्यासाठी आणि मुख्यत: आपलं जगण समृद्ध करण्यासाठी आपण नेहमीच जगात काय चाललं आहे याचं भान ठेवलं पाहिजे. हे संकेतस्थळ यासाठी निश्चितच उपयुक्त ठरेल
- प्रज्ञा शिदोरे
(३० मार्च २०१२ रोजी "लोकमत"च्या ऑक्सिजन पुरवणीमध्ये प्रकाशित)
No comments:
Post a Comment